Vieiros

Esta semana a Axencia Española de Protección de Datos (AGPD) resolveu poñerlle á dirección do PP unha multa de máis de 60 mil euros por incluír nas listaxes electorais do partido en Euskadi, nas eleccións municipais de 2007, os nomes de varios veciños do Grove (O Salnés) sen o seu consentimento.

Hai que axudar aos vascos
A dirección do Partido Popular decidiu recorrer a multa, e esta quinta feira o presidente do PPdeG, Alberte Núñez Feijóo defendía esta postura. O popular galego dixo que o seu partido actuou "de boa fe" neste caso "en todo momento", polo que se amosou partidario da decisión de recorrer a sanción "cos argumentos que se teñan dende o PP de Pontevedra".

Porén, Feijóo quixo insistir en "lamentar o acontecido" se o partido "errou en algo", aínda que considerou que "axudar aos paisanos vascos é algo positivo, e isto non significa que haxa que facelo co escrupuloso cumprimento da lei". O líder dos populares galegos terminou avogando por que o seu partido acredite ante a opinión pública e a Xustiza "se cumpriu ou se desviou da lei".