Vieiros

O taikonauta Zhai Zhigang, de 41 anos, culminou este sábado con éxito unha misión de actividade extravehicular (EVA, nas súas siglas en inglés), máis coñecido como 'paseo espacial', a primeira que realiza China na súa historia.

Poucos minutos despois de saír, o seu compañeiro Liu Boming sacou parte do seu corpo a través da escotilla e entregoulle unha bandeira chinesa, que axitou fronte á cámara.

"Síntome ben, e saúdo ao pobo chinés e aos pobos de todo o mundo", declarou Zhai mentres abandonaba a Shenzhou VII, a terceira nave espacial tripulada do país asiático, ataviado co traxe espacial Feitian, de fabricación chinesa.

Feitian, literalmente "voando cara ao ceo" en chinés, conta con 10 capas e pesa uns 120 quilos. A súa fabricación custou 30 millóns de yuanes (4,4 millóns de dólares) e precisa ao redor de 15 horas para ser armado.

O primeiro 'paseo espacial' da historia deuno o cosmonauta soviético Alexei Leonov o 18 de marzo de 1965. Despois virían outras EVAs, as máis coñecidas, as realizadas por astronautas estadounidenses na superficie da lúa.