Vieiros

A crise económica e, concretamente, a suba dos prezos dos carburantes, está tamén a ter un forte impacto nos Estados Unidos. Moita xente está disposta a case calquera cousa por conseguir tarxetas de combustíbel de balde, que son o premio de moda. E iso que, ao cambio, o prezo medio do litro de gasolina nos EUA anda lixeiramente por riba dos 70 céntimos de euro.

Un dos casos máis peculiares é o dun habitante de Florida, David Partin, que lle poñerá ao seu fillo Dixon Willoughby, como os presentadores dun programa de radio, a cambio dun bono de 100 dólares de gasolina.

Segundo conta Reuters, o bordel Shady Lady Ranch, en Nevada, dá vales de 50 dólares de combustíbel aos clientes que gasten, cando menos, 300 dólares durante este mes. Xuño e xullo son temporada baixa, explica o propietario do negocio. Nunha semana xa se repartiron 200 tarxetas.

En Texas estanse a producir roubos de gasolina por valor de 100 dólares dos autobuses do centro de día da igrexa Higher Ground. Pola súa banda, unha parroquia de Massachusetts sortea un vale de 50 dólares entre as persoas que acudan á misa semanal.

Entre tanto, a Cruz Vermella dos EUA está a desenvolver unha campaña de verán pola que os doadores de sangue poden gañar un subministro anual de combustíbel.