Vieiros

O presidente estadounidense, George W. Bush, deu esta cuarta feira unha cálida acollida na Casa Branca ao líder da igrexa católica, o Papa Bieito XVI -Joseph Ratzinger-, e gabou a mensaxe que este representa.

"Nun mundo no que algúns evocan o nome de Deus para xustificar actos de terrorismo, asasinato e odio, necesitamos a súa mensaxe de que Deus é amor; e abrazar este amor é o camiño máis seguro para salvar o home de ser presa dos ensinos do fanatismo e do terrorismo", afirmou Bush.

Ademais, o presidente fixo especial fincapé no feito de que Estados Unidos é "unha nación de oración" e por iso atopará neste país "unha nación que lle dá a benvida ao papel da fe na escena pública" e que "cre na liberdade relixiosa".

Abusos sexuais a menores
Pola súa banda, Ratzinger, nun discurso ante case 400 bispos, cuestionou esta tolerancia relixiosa e revelou o seu temor a que diminúa a fe católica entre a sociedade estadounidense, derivando no relativismo, porque esta "é moito máis importante na vida pública de Estados Unidos que na "secularizada Europa", e alertou do perigo destas "correntes seculares".

Por outra banda, o papa reiterou a súa "profunda vergonza" polos casos de abuso sexual de menores por parte de sacerdotes católicos. Ademais, citando as palabras do presidente da conferencia episcopal de EUA, Francis George, dixo que a resposta aos escándalos "non foi sinxela" e estivo "pésimamente xestionada".