Vieiros

"Convoco a todos os arxentinos e arxentinas, sen agravios sen rancores e sen descualificacións", chamou este xoves a senadora e candidata á presidencia da Arxentina polo Frente para la Victoria, Cristina Fernández. Foi no acto co que pechou a súa campaña, 48 horas antes da elección deste domingo, xusto antes do silencio de dous días imposto por lei para a reflexión dos cidadáns.

Segundo as enquisas, a muller do presidente Néstor Kirchner ten moitas probabilidades de rematar o domingo coma presidenta electa. Se iso non pasa, será pola presenza doutra muller: a avogada Elisa Carrió, tamén candidata e que, segundo os cálculos, ocupa o segundo lugar con algunhas posibilidades de chegar a unha segunda volta.

En sintonía con eleccións presidenciais anteriores na rexión, as mulleres son protagonistas indiscutidas nesta votación. A deste domingo será a sexta presidencial consecutiva desde 1983, o período democrático máis longo que recoñece a Arxentina nos seus case 200 anos de historia.

A votación

O comicio xeral será o cuarto que se defina de acordo co sistema aprobado pola Constitución reformada en 1994, que prevé unha segunda volta electoral no caso de que ningún dos candidatos supere o 40 por cento dos votos con 10 por cento de diferenza sobre o segundo.

Tampouco haberá ballottage no caso de que unha fórmula presidencial obteña o 45 por cento dos votos, sen importar canto logre o inmediato perseguidor.

É a primeira vez que tres mulleres disputan o cargo político máis significativo do país, dúas das cales, Cristina Fernández de Kirchner -a terceira é Vilma Ripoll-, polo Frente para la Victoria (FPV), e Elisa Carrió, pola Coalición Cívica (CC), teñen trazas de ser consagradas presidentas, segundo as principais enquisas do país.

Ademais do Presidente e do Vicepresidente da Nación, os 27.009.192 arxentinos habilitados para votar deberán elixir senadores nacionais en oito provincias e 130 deputados nacionais en todo o país.

Poder en feminino

Cristina Fernández convocou a todos os arxentinos á construción dun espazo amplo "sen agravios e descualificacións" para afrontar os "profundos" cambios que restan impulsar no país. Fíxoo este xoves, ao pechar a campaña con vistas ás eleccións do domingo nun acto que encabezou no Mercado Central.

A senadora instou ademais a afondar os cambios impulsados polo presidente Kirchner e asegurou que "necesitamos máis educación e máis saúde. Por eses soños imos o 28". Desde o mesmo escenario que elixiu Kirchner para pechar a súa campaña en 2003, Cristina recordou que nesa oportunidade xunto ao presidente tiñan o soño "de derrubar os muros da impunidade" e a "recuperación da dignidade do traballo como gran organizador da familia".

"Viñamos tamén co soño de recuperar para todo o pobo a dignidade dos representantes no Parlamento e no Executivo. Para que todos soubesen que as decisións se toman na Casa Rosada e no Parlamento e non nas oficinas do Fondo Monetario Internacional", salientou.

Pola súa banda, a candidata da Coalición Cívica, Elisa Carrió, realizou unha forte apelación aos indecisos e a sectores máis pobres para que a acompañen co seu voto para chegar á segunda volta e reivindicou os valores do radicalismo, o socialismo e a acción social de Eva Duarte.

"Quero pedirlles o voto a quen non se decidiron, a quen teñen medo, para sermos forza de rescate dos nosos irmáns que están na pobreza. Somos a segunda forza do país e o domingo podemos ser a primeira e gobernar", afirmou tamén o xoves á noite Carrió na súa última convocatoria masiva antes do inicio da veda electoral.

A mensaxe final da candidata da Coalición no complexo Costa Salguero atravesou durante todo o acto a idea de chegar a unha segunda volta electoral co oficialismo nas eleccións do domingo, que foi reforzado polo discurso previo do seu compañeiro de fórmula, Rubén Giustiniani, polos anuncios que se reproduciron e polas cancións da militancia.

A heteroxénea composición da Coalición (hai dende forzas da dereita máis católica e tradicional até o socialismo e boa parte da oposición non peronista) levou a Carrió ademais a rescatar "o camiño percorrido polo socialismo, o significado da ética e a república como o foi para Leandro Alem" e unha extensa reivindicación á figura de Eva Perón, a quen
desapegou de prácticas clientelares. "Queremos sacar aos nosos irmáns pobres da pobreza. Moitos deles aman a Evita, quen coñecen o significado dunha máquina de coser, dun pan doce, dunha bicicleta... eran símbolos dunha política que sacaba aos pobres da indixencia, non era clientelismo", remarcou.