Vieiros

O parlamentario do BNG Bieito Lobeira presentou unha iniciativa para que os menús dos teléfonos móbiles inclúan a lingua galega. O deputado reclámalle ao Goberno, nunha proposición non de lei para o seu debate en comisión, que lles esixa ás operadoras de móbiles coas que subscriba contratos que inclúan a nosa lingua nas opcións dos seus terminais e na atención ao cliente.

Lobeira propón, asemade, que se cree un dicionario de abreviaturas para mensaxes curtas. Con todas estas medidas, o parlamentario nacionalista considera que se pode garantir a igualdade de dereitos lingüísticos con Cataluña, onde as empresas xa ofrecen a posibilidade de escoller a lingua catalá dende hai anos.

Ademais, denuncia o feito de que a nosa lingua sexa a que ten menos implantación nos novos dispositivos, e pon como exemplo o caso de novos terminais que teñen a opción de castelán, catalán e vasco, pero non galego, e nos aparellos que se empregan no Parlamento non hai opción do idioma do país nin do portugués.