Vieiros

A Junta de Andalucía acaba de anunciar que pagará entre o 50% e o 100% da conexión a internet das familias. Por primeira vez calquera familia poderá obter a subvención, sen que sexa requisito vivir no rural ou ter poucos ingresos. O único límite é o número total de axudas dispoñíbeis, 30.000.

Esta situación contrasta co caso galego, no que unicamente as familias numerosas -aquelas con tres ou máis fillos- puideron pedir axudas en 2006.

Máis de 90.000 euros sen gastar
O resultado foi que un número insignificante de familias galegas, 53, obtivo a subvención. O total dispoñible para as axudas era de 105.000 euros. Tan só se chegaron a repartir 10.600 euros.

Segundo a Xunta, a causa do impacto tan reducido das axudas é que unicamente se presentaron 53 solicitudes que cumprían os requisitos da convocatoria.

Insuficiente para pagar a conexión
A Orde da Vicepresidencia fixaba a contía máxima da axuda en 200 euros para todo o ano. Unha cantidade insuficiente para asumir o custe dun ADSL básico, que ronda, como mínimo, os 330 euros ao ano. En Andalucía subvenciónase o 100% do prezo ás familias máis necesitadas.

Galiza segue a cola no uso de internet no Estado. O 30% dos fogares galegos dispoñen de acceso a internet, máis de dez puntos por detrás da media española, segundo datos do INE. Unicamente en Estremadura hai un menor porcentaxe de casas conectadas.