Vieiros

O presidente do goberno vasco, Juan José Ibarretxe, anunciou este venres nunha comparecencia pública que as eleccións ao parlamento de Euskadi serán o 1 de marzo. Xusto antes do anuncio, o consello de goberno de Euskadi reuniuse de maneira extraordinaria.

No seu anuncio, Ibarretxe asegurou que era necesario convocar os comicios canto antes porque "vivimos tempos complicados", polo que serán, finalmente, o primeiro domingo do mes de marzo. Deste xeito, os comicios lexislativos vascos e galegos coincidirían na mesma data, precisamente o que o Goberno desexaba evitar.

Reaccións
O vicesecretario xeral do PSdeG, Ricardo Varela, asegurou que a convocatoria das eleccións vascas para o 1 d emarzo "non interferirá para nada na folla de ruta" das galegas. En declaracións a Europa Press, Varela dixo que o PNV "saberá as razóns" polas que programou os comicios o mesmo día e sinalou que descoñece "o interese que pode ter nesa coincidencia".

En calquera caso, manifestou que respecta a decisión de Ibarretxe e lembrou que Touriño fixera o anuncio "con tempo máis que suficiente" e que expresou a súa vontade de que as eleccións galegas non coincidisen con outra cita electoral, polo que as adiantou de xuño a marzo para evitar as europeas.

En canto á campaña electoral, Ricardo Varela dixo que será "en clave exclusivamente galega", e que os comicios vascos "non deben nin van intervir" nela.