Vieiros

Por que viñeches a Galicia?

Fun invitado por Intermón-Oxfam, para dar a coñecer o traballo medioambiental que realizamos fomentando a participación no coidado consciente do noso contorno.

Por que fuches elixido?

Fun elixido xunto a outras dez persoas doutros tantos países, todos mozos implicados no medio natural e todos participantes dun encontro que tivo lugar en Sidney, Australia, en Outubro do 2007 a onde acudimos mozos de 100 países convocados por Oxfam Internacional.

Cando e por que naceu a vosa organización?

Foi no ano 2006. Levabamos tempo observando os efectos prexudiciais das actividades económicas sobre o noso contorno: deforestacións, contaminacións de augas e de animais, abandono de saberes tradicionais, prolongadas secas... Moitas persoas tiveron que emigrar das zonas rurais. Un grupo de xente de Los Sauces sentimos a inquedanza de que había que facer algo. Mozos, estudantes, profesores, amas de casa, labregos e indíxenas mapuche, xuntámonos, falamos e pensamos en buscar solucións para os problemas ambientais que nos afectaban.

Que actividades económicas hai nesta zona de Chile?

Existen grandes plantacións forestais e a recolección da Mosqueta, planta que se utiliza para cosméticos. Os indíxenas viven tamén da recolección doutros froitos e da pequena gandería e pesca. Traballos ligados á natureza.

Que actividades realizades e que pretendedes?

Un exemplo pode ser o proxecto “Auga e saberes. Diálogos para a Vida”. Lévase a cabo conxuntamente entre unha comunidade indíxena mapuche e unha organización de profesionais forestais. Consiste en reforestar con árbores autóctonas e plantas medicinais combinando os saberes ancestrais da cultura mapuche e os coñecementos técnicos actuais. Créanse viveiros para estender a iniciativa a outros lugares. Realízanse charlas e obradoiros sobre medicina mapuche, reforestación, praguicidas, lexislación... Remataremos coa edición dun manual de saberes mapuche e un seminario sobre as temáticas abordadas no Proxecto coa participación doutras organizacións sociais, empresariais e gobernamentais. Temos cofinanciamento dun Fondo Estatal.

Outro tipo de actividades son de carácter educativo e de sensibilización. Pretendemos difundir e crear conciencia sobre os problemas medioambientais, as súas causas e consecuencias e a procura de alternativas. Facemos obradoiros de reciclaxe nas escolas e tamén de compostaxe e de manexo de viveiros de plantas autóctonas. Realizamos campañas de difusión con charlas, radio, valos publicitarios, sobre aspectos concretos como por exemplo o abuso de pesticidas. Tamén promovemos actividades culturais e de recuperación da cultura e lingua dos mapuche.

Cal é a idea fundamental que move o traballo de Nguallen Pelu Mapu?

Pensamos que non podemos esquecer a nosa ligazón coa terra. Ela dános os alimentos e materiais para cubrirmos as nosas necesidades. Pero estamos abusando dela, maltratándoa. Temos que escoitar as súas queixas e coidar a relación con ela. Hai que recuperar o contacto máis directo, acariñala, cantar coa súa música, camiñar e traballar para gozar xuntos, complementariamente.

Como podemos coñecer algo máis da vosa experiencia?

Visitando a nosa páxina www.nguallen.cl ou visitándonos na novena rexión, Araucanía, Los Sauces, en Chile.
Moitas grazas por estes días de convivencia e intercambio.