Vieiros

As sedes da Fundación Caixa Galicia de Vigo, Lugo, A Coruña e Ferrol e o Centro Cultural da Deputación de Ourense acollerán dende o 24 de setembro e até o vindeiro mes de febreiro cinco exposicións que traen a Galiza a algúns dos fotógrafos máis sobranceiros das últimas décadas e da actualidade. É a segunda edición de PhotoGalicia, que xa o pasado ano ofreceu as obras de Alberto García Alix, Sylvia Plachy, Sebastião Salgado, Man Ray e Manuel Vázquez, na primeira ocasión en que PhotoEspaña saía de Madrid.

A primeira exposición en abrir as súas portas será a da nova fotógrafa galega Victoria Diehl, chamada 'Frías, fráxiles, durmintes', nas que a artista conxuga as novas técnicas dixitais coa revisión da escultura clásica. En Lugo, a partir do 1 de outubro poderase ver o traballo do prestixioso fotógrafo italiano Gabriele Basilico, que en 'Intercity' amosa unha síntese da súa actividade dos útimos sete anos, centrada na paisaxe urbana, nomeadamente na de Moscova.

Na Coruña, o 2 de outubro abrirá as súas portas a exposición dedicada a W. Eugene Smith, con máis de 200 fotografías caracterizdas pola súa intensidade na mostra 'Máis real cá realidade'. Pola súa banda, o Centro Cultural da Deputación de Ourense recollerá a partir do 3 de outubro 31 imaxes de formato panorámico nas que Javier Vallhonrat busca expresar a dimensión dramática da natureza.

Finalmente, en Ferrol, a exposición 'Neorrealismo. A nova imaxe en Italia, 1932-1960', aberta dende o 3 de outubro ao 5 de xaneiro, exhibirá máis de 250 materiais, fotografías, publicacións e filmes.