Vieiros

Cos resortes do partido en Galiza practicamente controlados, agás a sempre inestábel baronía ourensá onde o fervor baltarista agora mesmo proclámase entregado á causa de Feijoo, a dirección actual do partido decidiu adiar un congreso que de momento consideran innecesario. Deste xeito, a xunta directiva do PPdeG aprobou por unanimidade a proposta do presidente do partido, Alberto Núñez Feijoo, de que o congreso se celebre despois das próximas eleccións, que con probabilidade serán no mes de marzo de 2009.

Segundo a xunta directiva, trataríase dun "acto de responsabilidade e transparencia ante a militancia". Feijoo apuntou ao respecto que se trata de "non xogar con vantaxe diante da convocatoria electoral e para que os militantes poidan elixir o seu novo equipo directivo cos resultados electorais coñecidos".

Por outra parte, o secretario xeral do PpdeG, Afonso Rueda, aproveitou para facer comparativa co congreso do PsdeG celebrado esta fin de semana, un encontro onde segundo Rueda, Touriño saiu elixido "á búlgara" e "pola única razón de que Xosé Blanco, que é quen manda no partido en Galiza, non se presenta". "Precisan reforzar un liderado que, lonxe de consolidarse durante estes tres anos de Goberno, é aínda máis débil polo balance de decepción do bipartito", analizou Rueda, "Touriño non ilusiona a ninguén e sae elixido porque estando no Goberno aos membros do PSOE non lles queda outro remedio".