Vieiros

A CIG prognostica que Galiza sufrirá "de forma importante" a crise económica, debido a que está a afectar "fundamentalmente" ao sector da construción, de importante peso no país. O secretario xeral do sindicato, Suso Seixo, prognosticou este venres que moitas empresas decretarán suspensión de pagos "despois do verán", pois o sector da construción arrastra consigo outros como o do metal e o da madeira.

A solución ao problema, segundo Seixo, é apostar polo autogoberno de Galiza, mediante a transferencia de competencias plenas en materia de lexislación laboral e social e de inspección de traballo e seguridade social. Tamén pediu que as caixas de aforros se impliquen "no sistema produtivo galego para saír da crise".

Seixo advertiu de que os ciclos "van sempre máis atrasados" en Galiza que no Estado Español, pero que a crise "si que se vai deixar sentir" no país, polo que avogou por un modelo económico máis xusto fronte ao neoliberal e "camiñar cara ao socialismo". Para iso, propuxo mellorar o poder adquisitivo dos salarios, a estabilidade laboral, a conciliación da vida familiar e melloras no servizo galego de colocación e no de formación profesional.