Vieiros

Baixo o lema Afianzando o Nacionalismo Xuvenil, as bases máis novas dunha das formacións integrantes do BNG, Esquerda Nacionalista-Mocidade, organizan este sábado a súa décima Asemblea Nacional.

Tras a lectura e o debate do Informe de Actividade Política, así como das emenda dos relatorios político, organizativo e de igualdade, terá lugar no Hotel Virxe da Cerca de Compostela a elección da nova Mesa Nacional, máximo órgano de decisión entre asembleas, así como do seu novo voceiro.

Substituirá no cargo a Saúl Santim, que marcha tras seis anos á fronte da Portavocía. O aínda voceiro de EN-Mocidade salientou na semana da súa despedida que "para ter unha visión real da sociedade galega cumpre interaccionar con ela; formar parte da sociedade como un cidadán máis, neste caso como un mozo máis".

Ademais, valorou positivamente que "dende a asemblea nacional do Porriño, protagonizamos a maior expansión organizativa que tivo EN-Mocidade desde o seu nacemento", aínda que recoñece que "fican grandes retos por diante" e que cómpre adaptarse as necesidades da mocidade, en constante proceso de mudanza.

Ás 18.30 horas comezará a sesión de clausura da Asemblea Nacional coa aprobación das resolucións asemblearias, o saúdo das delegacións convidadas e as intervencións políticas de peche.