Vieiros

Oito persoas, das que cinco son axentes da Garda Civil, foron detidas en Vigo por un presunto delito de contrabando de tabaco. A rede operaba a través do porto da cidade. A operación, en marcha dende o pasado 31 de agosto, mantense aberta, segundo confirmaron a Europa Press fontes da Subdelegación do goberno español en Pontevedra.

O xornal Faro de Vigo informa este venres da detención dos axentes, destinados nos Servizos Fiscais do Porto de Vigo. A operación policial levárona a cabo membros dos Servizos Centrais da Garda Civil en Madrid, que están a tratar de determinar o alcance internacional da rede delictiva.

Tres dos axentes -E.C.F., X.A.C.F. e X.E.E.O.- ingresaron xa en prisión por orde da titular do Xulgado de Instrución número 2 de Vigo, onde prestaron declaración. Todos son gardas con varios anos no mesmo destino. Un cuarto axente permanece ingresado nun hospital xa que semella sufriu unha arritmia cando foi detido. O resto dos detido quedaron en liberdade tras comparecer perante a xuíz.

As dilixencias xudiciais abríronse por un delito de contrabando, aínda que non se descarta un posible suborno. No caso de que a investigación emprendida por Asuntos Internos da Garda Civil confirme outras supostas corruptelas administrativas dos funcionarios, a imputación poderíase ampliar.