Vieiros

Dende a consellería, houbo moita receptividade de cara ao compromiso da formación do profesorado, de xeito que supere os mínimos estabelecidos no Plano de Normalización aprobado no Parlamento na lexislatura anterior. Anunciou tamén a próxima oferta pública de emprego destinada ao profesorado, na que se convocarán un número maior de prazas e terán cabida máis especialidades que na oferta do ano pasado.

Ademais, a CIG-Ensino puxo sobre a mesa temas como a reforma dos cadros de persoal, ou o desenvolvemento da LOE (currículos, carga lectiva das materias, nomeadamente Tecnoloxía, e Regulamentos Orgánicos dos Centros Docentes). A Conselleira afirmou que está prevista unha futura negociación nestes campos, e tamén de cara ás melloras para a xubilación anticipada e as condicións de traballo do profesorado itinerante. A longo prazo, pénsase nunha Lei das Universidades Galegas, a Lei do Sistema Educativo Galego e a elaboración do Estatuto Docente Galego. Mais tamén alegou dificultades orzamentarias con respecto a outras propostas da CIG-Ensino: no tocante á mellora das retribucións, e ao cobro xeralizado do complemento de especial dedicación ao centro e do nivel 24 para o corpo de mestres. Neste senso, a Consellería e a CIG Ensino coincidiron na necesidade de reclamarlle ao MEC a transferencia global de 60 € para todo o profesorado. O Ministerio está á espera de negocialo coas comunidades autónomas.

Houbo outras propostas da CIG que se contemplan xa a longo prazo por parte da Consellería: a estabilidade e mellora salarial do profesorado interino, adopción doutras melloras retributivas ou a modificación do regulamento da xornada única.