Vieiros

Ao ciclista galego Óscar Pereiro non lle chegaron os folgos: realizou unha excelente décima tirada do Tour, da que foi protagonista durante un bo pedazo, pero esfondou ao final e chegou de 37º a máis de sete minutos do novo líder, Lance Armstrong. A montaña comezaba hoxe, e o estadounidense amosou por fin todas as trazas de conseguir a súa sétima volta a Francia. O esforzo durante gran parte da tirada fíxoo o alemán Jascke, e detrás del saltaron unha ducia de corredores entre os que se atopaba Óscar Pereiro. Durante moitos quilómetros o mosense foi segundo, pero a dez da chegada foi apreixado por un grupo intermedio do que tiraba o equipo de Armstrong. Ao final, a tirada venceuna o español Alejandro Valverde, da man de Armstrong. Mañá haberá outra intensa tirada alpina subindo aos cotos especiais da Madeleine e Galibier e chegando nun descenso ata a vila occitana de Briançon.